– Не знаю, – мерян, – у нас в деревне все эрзя. Может, мокша мордва?
Рузось седеяк тетькинзе сельмензэ:
– Странно. Я вот так же разговаривал с мокшанами. Они тоже говорят: мы не
мордва. Мы мокша. А мордва – это эрзя.
Истямо ладсо лисни: а эрзятне, а мокшотне “мордвакс” пряст а лемдить.
Вейкеяк
эрзя а мери: мон мордвин. Сон мери: мон эрзян. Ды аволь ансяк а лемдить.
Пек
ламо эрзят, конат эсь пряст марить алкуксонь эрзякс, “мордванть” ловить
сёвномань, покордамонь валокс. Теде минь весе содатано. Секс, арсян, а
стяко
иестэ иес аламолгадыть эрзятне! А стяко тыщань тыщасо рузыить, а стяко
апак
рузыязтнеяк паспортонь саемстэ пряст сёрмадстыть рузокс! Кинень вечкеви
пингень
перть кантнемс весемеде документсэ покордамонь вал?! (Оренбургской
областьсэ
вейкэ тонавтыця ёвтнесь: паспортонь саемстэ эрзятне, бути а сёрмадовить
рузокс,
ёвтыть пряст татарокс, чуважокс, ансяк аволь “мордвакс”. Вана
сёрмадовольтькак
паспортонтень алкуксонь леменек – эрзя – сестэ лия тевесь!).
Ламонь, пек ламонь пельде марсинь истят пеняцямот, ансяк вешемс те меленть

топавтоманзо, кевкстемс “вере” аштицятнень: ужодояк, мекс минек лемдить
аволь
лемсэнек? Мекс миненек пингень пингешка пшкалить травамкасо? – тень кисэ
кияк
вайгель а кепеди.
Миненек малавис лия раськетнень революциядо мейле сатотсь чарькодемаст
велявтомс
эсь алкуксонь лемтнень. Истя, удмуртнэ лоткасть улемеде “вотякокс”,
марийтне –
“черемисэкс”, саамтняэк ней аволь “лопарть”, эстонецтнэ ды финнтнэ – аволь

“чухна белоглазая”, кода покорясть эйсэст “ине” рузтнэ. Украинецтнэнь
паспортскак кияк а сёрмали “малоросс” эли “хохол”, рузтнэяк аволь
“москальть” ды
“кацапт”, кода тенст мерилть славянонь лия раськтне.
Ды ансяк эрзятнень сестэ эзть сато превест ёртомс те покордамо валонть!
Минек,
келя, “мордва” лементь ало седе содасамизь. Содавольтькак сеть, кить
комсеце
иетнестэ анокстасть – лемдясть автономиянть, кода нуцькаст кармить
нулгодеме те
лемденть ды зяроксть сынст сюдосызь сестэ нолдазь превтемечинть кис!..
“Мордват”. Кить сынь?
Бути эрзятне ды мокшотне а лемдить эсь пряст “мордвакс”, сестэ косто
саевсь те
валось? Кодамо сонзэ смустезэ?
Историянь книгатнесэ пачтяви вана мезе. Аланонь монахось Иордан “Тоттнэнь
чачомадо ды тевдест” книгасонзо васенцеде лецтинзе “меренс” ды “морденс”
раськень лемтнень. Те ульнесь VI пингестэнть. Сынь лецтявить Рав чирень
лия
раськетнень ютксо, конат се шкане пандсть каявкс готтонь инязоронтень
Германарихнень.
Кодамо смустезэ “морденс” (лия таркатнесэ “мерденс”) валонть, кона мейле
славянтнэнь ёвтамосо теевсь “мордвакс”? Тень коряс улить зярыя а вейкеть
арсемат. Васенцесь: омбо масторонь ломантне, конат яксесть эрзятнень мода
ланга,
улема, сеедьстэ марсесть мирде валонть. Эрзянь келенть апак сода, сынь
арсесть:
те валонть смустезэ – ломань (ки соды, паряк, истямояк смустезэ ульнесь
кезэрень
шкане?), секс мирде (мерденс, морденс) валось, арсесть сынь, те, секень
вант,
улияк раськенть лемезэ.
Омбоцесь: вете-кото тыщат иеде теде икеле ульнесь Моданть лангсо
финно-угрень
ине империя. Тозонь совиль цек виев, шумбра раське, конань цёратне
ульнесть
весемеде а пелицят, эрьва тюремасо сынь мольсть икеле икеле ды зярдояк
пленс
эзть сайне ломанть. Тюремань паро трофеекс, виень ды а пелемань невтемакс
ульнесь се, зяро ятт машты тюрицясь. Сынст (маштозь яттнэнь) ловильть
камбразос
понгавтозь прякедтнень коряс. Шабра раськетне лемдизь неть ломантнень
“мерденс”,
“морденс”, мезесь, келя, ютавтовиль: “куломань кандыця”.
А содави, кона гипотезась виде, кона – кичкере. Ученойтне истят жо
ломанть, кода
весе. Ды меремс: ансяк вана те – виде, лиясь – а виде, ули манчемакс.
Маряви,
васенцесэнтькак, омбоцесэнтькак ули видечинь смусть (эрзянь кельсэ нейгак
ванстовсь весемеде покш тандавтомась: ванок, прякедеть лутаса! Те
тагомезде истя
жо корты).
Кода илязо уле, “мордвакс” минек лемдимизь шабрань раськетне, аволь минсь.

Истямо валонок арась.
“Мордва” лемесь, конань кармасть содамо Иорданонь пельде, вастневи мейле
рузонь
ды чивалгома ёнксонь конёвтнесэ. Истя, мордвадо ды моксельде (мокшадо)
корты
Рубруквис миссионерэсь. Кой-кона исследовательне мордва лементь сюлмить
ансяк
эрзятнень марто (ист. Наукань докторось А. П. Смирнов, “Этногенез
мордовского
народа по данным археологии I–XV вв. н.э.”).
Хазаронь инязоронть Иосифень сёрмасо (X пинге) ёвтавить раськетне, конат
пандсть
тензэ каявкс: бур-тас, бул-г-р, с-вар, ари-су, ц-р-мис ды лият. Арису
лементь
ало ученойтне неить эрзя лементь, кона хазарокс ёвтазь, полавтызе чаманзо.

Эрзяв ды мокшов явоманть археологтне редить од эрань ушодовомсто эли,
паряк,
седеяк икеле. VII пингентень, мерить, те явомась прядовсь. XII-це пингенть
самс
эрзятне ды мокшотне ульнесть кавто башка раськекс, конат явовсть кода
келень,
культурань коряс, истя рунгонь, чамачачонь коряскак.
Рузонь этнографось И. Н. Смирнов “Мордва” (1895 ие) очерксэнзэ сёрмады:
“Что касается отличия Эрзи от Мокши, то оно выражается в физическом типе и
в
ряде особенностей внешнего и внутреннего быта.
Присматриваясь к мокшанской толпе, наблюдатель скоро заметит, что она
представляет бульшее разнообразие типов сравнительно с эрзянской. Рядом с
белокурыми, сероглазыми и обладающими светлой кожей особями, из которых
состоит
эрзянская толпа, мы встречаем здесь значительное, едва ли не
преобладающее,
количество особей, обладающих черными волосами и глазами, смуглым,
желтоватым
цветом кожи. Мокша в большей части случаев, как и Эрзя, обладает круглым
лицом,
но строение его иное, чем у Эрзи. Не решаясь характеризовать это различие
в
терминах анатомо-антропологических, мы отметим только, что мокшанские
круглые
лица приближаются по типу к татарским и чувашским”.
Кона-кона тонавтозь ломантне бажить човорямс эрзятнень ды мокшотнень
вейкине
“мордовской” раськес. Те “консолидациясь” ветяви ламо кементь иеть ды,
уцясказонок, эзь прядово нейгак. Мерян: уцясказонок, вана мекс.
Мордвинизациясь
– те кавто раськень куловтома, човорямонть эйстэ лисить рузт.
Историясь истя теизе: финнтнэ-угратне ламо тыщат иеде икеле явовсть башка
раськева. Ды ней киньгак превс а сакшныть ормаза мельть: одс теемс сынст
эйстэ
та-кодамо вейке раське. А вана эрзятнень ды мокшотнень мекс-бути яла
бажить
“валомс вейс”. Ули тесэ чумост Мадъяронь ды Суоминь Масторонь
кельсодыйтненьгак.
Минек эрямонок-тевенек апак сода, потсто варштамо апак машто, сынь а
виздить
яволявтнеме, келя, ули мордовской – мокшэрзянь кель, ули истямо раське.
Илямизь
лово стяконь лабордыцякс, лецтяса мадъяронь кельсодыенть Ласло
Керестешэнь,
конань кортамонзо кунсолыя зырыя иеде теде икеле Саран ошсо “Вайгель”
вейсбндявксонь промкссо. Вечкевикс Ласло тунь апак кавтолдо кортась
“мокшэрзядо”, “мокшэрзянь кельде”: куш, кода паро кельсодый, вадрясто
чарькодсь:
“мокшэрзянь кель” масторонть лангсо арась, ды сон сонськак кортась эрзянь
кельсэ. Тешкстаса, Керестеш ялгась пек вадрясто содасы эрзянь келенть,
тень кис
мон седейшкава сюконян тензэ.
Превс а саевить мокшонь сеть ломантнень мелест, конат кортыть, келя, эряви
теемс
вейкине “мордовской” кель. Эрзянь ды мокшонь кельтне эрить кавтошка тыщат
иень
перть эли, царяк, седеяк умот, сынст эйсэ ладсезь мазыйдеяк мазый морот,
ёвтамот, ёвкст, сёрмадовить покш сёрмадовкст, нолдавить газетат, журналт,
эйдень
тонавтома книгат. Ёвтавлизьга, кода “вейкине келень теицятне” арсить теемс
те
келенть? Юрокс, келя, эряви путомс човор эриця эрзянь ды мокшонь кортавкс.
Каня,
те превей ули тевесь? Истямо човорязь кельсэ кортыть 1–2 велеть. Ды мезе:
сядот
тыщат ломанть, конат кортыть эрзякс, яволявтомат а видестэ кортыцякс ды
кармамо
тонавтомост “видестэ мордвакс” кортамо? Теде мейле а ули а эрзянь, а
мокшонь
кель, а кодамояк лия! Лецтясынек: эрзятне чачтыцяст-трицяст туртов мерить
авай
(мать), тетяй (отец); мокшотне – тядязе (мать), алязе (отец). Кода неть
пшкаддематне кармить гайгеме “вейсэнь” кельсэ? Бути ловцонь максыця
ракшантень
эрзятне мерить скал, мокшотне – тракс, кода сон карми улеме “мордовской”
кельсэ?
“Скалотракс” эли “траксоскал”? Истямо жо “мошкэрзя” валоськак, конань
теизь
“консолидатортнэ”. Те валост истямо пейдстевтиця ды смусттеме, натой а
чарькодеви, кода тень а несызь вельть тонавтозь ломантне? Мошкэрзясь – те
мезе:
пелезе мокшо, пелезе эрзя? Лецтинка теке лувонь лемтнень: чеченоингуш,
кабардинобалкар, чехословак. А чарькодеви, мекс советэнь масторсонть эзть
теекшнэ русоукраинецт, русобелоруст эли татаробашкирт? Содан, Финляндиясо
эрить
суомить ды шведт. Суомишведт эли финношведт мекс-бути арасть!
Кавто кельть – кавто раськеть
Алкуксонь лемень ёмавтомась эсь раськенть кис пшкадеме пелемась тапить
весе
тевтень, раштавтыть а чарькодемат, савтыть кежть. Тень лангс апак вано,
маряви:
те човорямось та-кинень пек эряви! “Мордва” валонть лангсо теезь ды идезь
диссертацият, сонзэ вельде саезь профессоронь, докторонь лемть. Ды бути
ней ули
яволявтозь: “мордовской нация” арась, сестэ мазнень лемень кандысь
“эрямонзо
путызе”? Ансяк эсест кис, покш лемтнень ды лембе таркатнень ванстомаст кис

тюрить неть “мордовской ученойтне” сеть эрзянь патриотнэнь карщо, конат
бажить
кемекстамс алкуксонь лементь.
Эрзятне ды мокшотне – кавто раськеть, конат кезэрень пингстэ лиссть вейке
юрсто,
кода финнэнь-угрань лия раськетнеяк. Ды ней ёмамо лангсо аволь та-кодамо а

чарькодевикс мордва. Ёмить, рузыить кавто кельть, кавто раськеть: эрзянь
ды
мокшонь. А карми улеме “мордва” човориця чарькодемась, весемесь ары эсь
таркава:
Россиянь Федерациясонть эрить малав миллион эрзят (Мордовиясо ансяк 160
тыщат)
ды 300–350 тыщат мокшот (эйстэст 170 тыщат – Мордовиясо). Неть цифратнень
мельсэ
кирдезь (сынь ланга-прявань, ломантнень сёрмалемстэ минек свал тешкстыть
човор:
мордва), а стака неемс, конась неть кавто раськетнестэ седе стака таркасо.

Эрзянь раськенть арась Масторозо. Мордовиясь томбальдень эрзятненень аламо
мейсэ
лезды. Истямо ладсо эрзятнень кияк а иди ассимиляциядонть. Сынь иестэ иес
рузыить, солыть, теке ведьс каязь сахарось. Секс а мезть абунгалемс, мекс
аламолгадыть эрзятне.
Inf пусмонь васенцэ номерсэнть максозь А. В. Алешкина “Мордва” статьязо.
Андрей
Васильевич мокша, ашти “фкя народ” теориянть кис. А стяко статьянть келес
эрьва
валрисьмесэ вастови “мошкэрзя” валось (рузонь вариантсонть – мордва).
Мон сеедьстэ арсян, мекс те аволь превей теориянтень весемеде кеместэ
кундасть
мокшонь ломантне? Паряк, сынь целить молемс эсь киява? Пелить башка
раськекс
совамо Модалангонь ламодояк ламо эрицятнень юткс? Ваннодо тынсь: весе
шкатнестэ,
весе икелев молемань тевтнесэ “мордватнень” ютксо ушодыцякс, сыргозтицякс
ульнесть эрзятне. Эрзятне седе кувать тюрсть христианизациянть каршо
(Несмеяна
Васильевень ды Кузьма Алексеевень прявтсо кепедевематне), эрзятне чачтасть
ламо
превей, ине ломанть (Никон патриархось, Аввакум протопопось, Л. Русланова
морыцясь, Россиясо а солцися модань васень тонавтницясь М. Сумгин,
революционерэсь-народникесь Р. Бодяжин, царень Россиясо Гос. Думань
членэсь,
сёрмадыцясь С. Аникин, тонавтыцятне А. Юртов, М. Евсевьев, А. Рябов, ине
скульпторось С. Эрьзя, поэтэсь Я. Кулдыркаев; 1918–20 ды 1941–45 иень
войнатнень
шкасто эрзясто лиссть зярыя ёроков ушмодейть: Чапаев, Кутяков, Фролов,
Пуркаев;
60 “мордвинтнэстэ” – Советской Союзонь Героямийтнестэ, арсян, пеледест
ламотне –
эрзят); ды нейгак, зярдо ушодовсь СССР-сэ раськень сыргоземась, Мордовиясо

тагояк эрзятне пурнакшнызь – сэрнякшнызь “Масторава” вейсэндявксонть,
конань
прявтокс аракшнось эрзянь профессорось Д. Т. Надькин. Секс а мезть
дивсемс, мекс
репрессиянь шкатнестэ эрзятнень ёмавксостсвал седе покшт.
Ней Сарансо регистрировазь колмо эрзянь вейсэндявкст: “Эрзянь Мастор”,
Рябов
лемсэ эрзянь келень идема фондось ды “Эрзява” авань курось. Те кемевти:
ламо
пингень лепштамонть лангс апак вано, эрзятнесэ ули эрямонь мель, сынь
бажить
молемс эсь киява.
Бути велявтомс мекев вейке раськеде арсемантень, эряви витькстамс: вейке
раськесь се, конань ули вейкине тиринь келезэ. Рузонь келесь Россиянь весе

раськетнень туртов вейке, ансяк сон – аволь тиринь кель. Сон раськеютконь
кель.
Вана бути мокшотне ютыть эрзянь кельс, сестэ карми улеме вейкине эрзянь
раське.
Эли бути эрзятне стувтсызь эсь келест ды кармить кортамо мокшокс, сестэ
ули
вейкине мокшонь раське. Ансяк истяня а ули, ды а эрявияк. Сексак кавонест
кельтнень (раськетнень) ванстомга эряви седе курок кадомс “мордвань”
теемадо
арсеманть.
Финноугрятне истякак пек ламо ёмавтсть неть “вейс валоматнень” кувалма:
мерят,
муромат, весть, чудть, мещерат...
Мон эрзян ды яволявтан: кадык зярдояк кулозь раськетнень юткс а понги монь

раськенть лемезэ. Кадык эрить эрзятне ды XXI-це пингентень совить эсест
лем ало!